av Halldis Moren Vesaas (I utval ved Guri Vesaas)
Denne veka vel eg å trekke fram ei samling av Halldis Moren Vesaas sine dikt. Dikta er plukka ut av Guri Vesaas, dotter til Halldis og Tarjei Vesaas. Anledninga for boka si utgjevnad i 2007 var ei jubileumsmarkering knytt til Halldis Moren Vesaas som ville fylt 100 år dette året. Dikta i boka fylgjer livssyklusen, frå oppvekst til aldring. Det er mykje kraft i Halldis sine dikt, og eg meiner det kan passe å fylle vintermånadane med setningar som får ein til å kjenne ekstra etter. Lite taler meir for boka enn orda til Moren Vesaas sjølv, så i denne bokanbefalinga vil avslutte med diktet hennar: «Å vera i livet – tre vers til mor». Ut over dette diktet har eg favorittar som «Lykkelege hender», «At du», «Ord over grind» og «Lyset». Fleire av desse dikta har seinare blitt sett melodi til, og eg anbefaler særskild Valkyrien Allstars og Amund Enger sine songar knytt til diktinga hennar.
Å vere i livet
Tre vers til mor
Dette: Å vera i livet,
open for alt ikring
bunden med sterke røter
til menneske og til ting,
gi både hjarte og hender
i omsorg som aldri svik,
var det som gav meining til ferda di
og lét deg få kjenne deg rik
Og den som er rik vil ha seg
eit hus som er såleis bygt
at alle som høyrer til huset
kjenner det godt og trygt,
og såleis at framande gjerne
kjem innom dørene der
og aukar den rikdom som finst der før
med alt det dei sjølve er.
Fattig var du om aldri
i livet du kjenne fekk
at mellom deg og dei andre
levande straumar gjekk
av tillit og varme som styrkte
kvart band som til livet deg batt,
og lar deg få kjenne, når alt blir gjort opp,
at meir enn du gav fekk du att.
Boka «100 dikt» samt fleire av diktbøkene til Halldis Moren Vesaas finn de på Hammerfest bibliotek.
Anbefalt av bibliotekar Amalie